“Türk dünyasında qadın gücü” Forumu çərçivəsində möhtəşəm Gala Gecə təşkil olunub

15 oktyabr 2025-ci il tarixində “Türk dünyasında qadın gücü” forumu çərçivəsində təntənəli Gala Gecə keçirilib. Tədbir Azərbaycan və Türkiyənin dövlət himnlərinin səsləndirilməsi ilə başlayıb.

Gecənin rəsmi hissəsində Azərbaycanda Qadın Sahibkarlığının İnkişafı Assosiasiyası (AQSİA)-nın İdarə Heyətinin sədri Səkinə Babayeva və Samsun İş Qadınları Dərnəyi (SAMİKAD)-ın İdarə Heyətinin sədri Şehnaz Dereli çıxış edərək qadın sahibkarlar arasında beynəlxalq əməkdaşlığın genişləndirilməsinin əhəmiyyətini vurğulayıblar.

Tədbirdə millət vəkili Səbinə Salmanova da çıxış edərək Azərbaycan və Türkiyə arasında qadın sahibkarlar sahəsində əməkdaşlığın güclənməsinin vacibliyini qeyd edib. O bildirib ki, bu cür platformalar iki qardaş ölkənin qadınları arasında dostluq körpüsünü daha da möhkəmləndirir və yeni tərəfdaşlıq imkanları yaradır.

Daha sonra SAMİKAD üzvləri təşkilatın fəaliyyəti və həyata keçirdikləri layihələr barədə təqdimatla çıxış ediblər. Rəsmi hissədən sonra Gala Gecə qeyri-rəsmi və səmimi atmosferdə davam edib.

Gecənin sonunda AQSİA üzvləri Səkinə Babayevanı doğum günü münasibətilə təbrik edərək ona xoş arzularını çatdırıblar.

Tədbir xatirə fotosu ilə yekunlaşıb və Türk dünyası qadınlarının həmrəyliyinin, dostluğunun və birliyinin parlaq nümunəsinə çevrilib.