“Uğuru Gözləmə, Özün Yarat!” – AQSİA Təlimi
February 18, 2026AWEDA Nümayəndə Heyəti Pakistan Konfransında Azərbaycanın Qadın Sahibkarlıq Ekosistemini Tanıtdı
February 18, 2026Azərbaycanda Qadın Sahibkarlığının İnkişafı Assosiasiyası (AQSİA) təşəbbüsü ilə Dövlət Vergi Xidmətində qadın sahibkarların vergi qanunvericiliyinin tətbiqi zamanı qarşılaşdıqları çətinliklərə həsr olunmuş görüş keçirilib.
Tədbirdə AQSİA tərəfindən 2025-ci il ərzində mikro, kiçik və orta sahibkarlıq subyektləri, xüsusilə qadın sahibkarlar arasında aparılmış müşahidələr və daxil olmuş müraciətlər əsasında formalaşdırılmış əsas problemlər təqdim olunub. Qeyd edilib ki, çətinliklərin əksəriyyəti vergi intizamının pozulması ilə deyil, normativ dəyişikliklərin tətbiqi zamanı yaranan anlaşılmazlıqlar, elektron vergi sistemlərindən istifadə və hesabat prosesinin mürəkkəbliyi ilə bağlıdır.
Görüşdə e-qaimə-fakturalar, ƏDV uçotu, vergi güzəştlərinin tətbiqi, DSMF və məcburi sosial sığorta ödənişləri, özəl tibbi müəssisələr üçün güzəştlər, bank hesablarının bloklanması və nağd/nağdsız dövriyyə ilə bağlı məsələlər müzakirə olunub. Eyni zamanda, dünya təcrübəsi və qadın sahibkarlar üçün tətbiq olunan beynəlxalq vergi modelləri diqqətə çatdırılıb.
Müzakirələr nəticəsində qadın sahibkarlar üçün vergi tutma mexanizmlərinin təkmilləşdirilməsi, birgə layihələrin işlənməsi və regional səviyyədə maarifləndirmənin gücləndirilməsi üzrə pilot layihələrin həyata keçirilməsi qərara alınıb.
AQSİA İdarə Heyətinin sədri Səkinə Babayeva Assosiasiyanın vergi inzibatçılığının təkmilləşdirilməsi və sahibkarların məlumatlandırılması istiqamətində Dövlət Vergi Xidməti ilə əməkdaşlığa hazır olduğunu bildirib.
