Kids Academy “Qadın məşğulluğunu ən çox artıran şirkət” nominasiyasının qalibi oldu
November 28, 2025Aqrar Biznes Festivallarının yekununa həsr olunmuş tədbir keçirilib
December 18, 2025İƏT Mədəniyyət Festivalı çərçivəsində keçirilən forumda qadınların yaradıcı sənayelərdə və sahibkarlıq ekosistemində rolu müzakirə olundu
Bakıda Heydər Əliyev Fondunun tərəfdaşlığı, Azərbaycan Respublikasının Mədəniyyət Nazirliyi və İslam Əməkdaşlıq Təşkilatının (İƏT) təşkilatçılığı ilə keçirilən “İƏT Mədəniyyət Festivalı: Bakı Yaradıcı Həftə–2025” çərçivəsində Qadınların Yaradıcı Forumu baş tutub.
Forum Azərbaycan Respublikasının Mədəniyyət Nazirliyi, İslam Əməkdaşlıq Təşkilatının Qadınların İnkişafı Təşkilatı (WDO), Azərbaycanda Qadın Sahibkarlığının İnkişafı Assosiasiyası (AQSİA) və “Yaradıcı Azərbaycan” platformasının birgə təşkilatçılığı ilə keçirilib.
Tədbirdə Heydər Əliyev Fondunun vitse-prezidenti Leyla Əliyeva, “KADEM” Vəqfinin Qəyyumlar Şurasının sədri Sümeyye Erdoğan Bayraktar, WDO-nun baş direktoru Afnan Al-Shuaibi, eləcə də Qazaxıstan, Bəhreyn və Özbəkistandan olan qadın innovatorlar və sahibkarlar iştirak ediblər.
Forumun açılışında çıxış edən WDO-nun baş direktoru Afnan Al-Shuaibi təşkilatçılara təşəkkürünü bildirib və qadınların bilikəsaslı cəmiyyətin formalaşmasında aparıcı rol oynadığını vurğulayıb. O qeyd edib ki, qadınların potensialının üzə çıxarılması, sahibkarlıq və yaradıcı təşəbbüslərinin dəstəklənməsi davamlı inkişafın əsas şərtlərindəndir. “Qadınlar həm mədəni innovator, həm də sahibkar kimi cəmiyyətə mühüm töhfə verirlər. Biz onların irəliləməsi və layihələrinin reallaşması üçün bütün imkanlarımızı səfərbər etməyə hazırıq”, – deyə o bildirib.
“KADEM” Vəqfinin Qəyyumlar Şurasının sədri Sümeyye Erdoğan Bayraktar çıxışında qadının yaradıcı sahələrdə sonradan iştirak edən deyil, bu sahələrin mahiyyətini formalaşdıran əsas güc olduğunu vurğulayıb. O, Azərbaycanın xalçaçılıq sənətini, eləcə də İznik və Kütahya çinilərini qadın yaradıcılığının tarixi nümunələri kimi qeyd edərək, türk mədəniyyətində qadının estetik zövqü və sənətkarlıq bacarığının mühüm rol oynadığını bildirib.
Forum çərçivəsində qadın sahibkarlığının inkişafı, yaradıcı sənayelərdə qadınların iştirakı, regional əməkdaşlıq və mədəni irsin innovativ yanaşmalarla bazara çıxarılması mövzularında müzakirələr aparılıb.
Qeyd edək ki, AQSİA qadınların ideyadan biznesə, biznesdən isə bazara çıxışını dəstəkləyən təşəbbüsləri ilə yerli və beynəlxalq platformalarda qadın sahibkarlığının gücləndirilməsində fəal rol oynamağa davam edir.
