“Qarabağ: Cənubi Qafqazdan dünyaya açılan yeni mənzərə” mövzusunda elmi-praktik konfrans keçirilib

Yeni Azərbaycan Partiyasının təşkilatçılığı ilə keçirilən tədbirdə postmüharibə dövrünün geosiyasi reallıqları, bərpa işləri və regional inkişaf perspektivləri müzakirə olunub

Dekabrın 24-də Yeni Azərbaycan Partiyasının təşkilatçılığı ilə “Qarabağ: Cənubi Qafqazdan dünyaya açılan yeni mənzərə” mövzusunda elmi-praktik konfrans keçirilib. YAP Nərimanov rayon təşkilatının sədri Samir Vəliyevin moderatorluğu ilə başlayan tədbir Dövlət Himninin səsləndirilməsi ilə açıq elan edilib.

Konfransda çıxış edən YAP Sədrinin müavini, Mərkəzi Aparatın rəhbəri Tahir Budaqov Azərbaycanın bölgədə formalaşdırdığı yeni reallıqlar, ölkəmizin hərbi-siyasi gücü və əldə olunan tarixi Qələbənin yaratdığı geniş perspektivlər barədə danışıb. O bildirib ki, Prezident İlham Əliyevin sistemli siyasəti nəticəsində Cənubi Qafqazda yeni geostrateji situasiya yaranıb, separatizm aradan qaldırılıb və regionda dayanıqlı sülhün bərpası üçün münbit şərait formalaşıb. Zəngəzur dəhlizinin açılmasının isə regionu tamamilə yeni iqtisadi və nəqliyyat xəritəsi ilə dünyaya təqdim edəcəyi vurğulanıb.

Tahir Budaqov işğaldan azad olunmuş ərazilərdə aparılan genişmiqyaslı quruculuq işlərinin sürətlə davam etdiyini, “Ağıllı kənd”, “Ağıllı şəhər” layihələri və yeni iqtisadi rayonların yaradılmasının Azərbaycanın milli gücünü daha da artıracağını qeyd edib. O, həmçinin Heydər Əliyev Fondunun tarixi, dini və mədəni irsin bərpasında gördüyü işlərin Qarabağın mədəni dirçəlişinə mühüm töhfə olduğunu söyləyib.

Daha sonra Qarabağ iqtisadi rayonuna daxil olan işğaldan azad edilmiş ərazilər üzrə xüsusi nümayəndə Emin Hüseynov “Böyük Qayıdış” çərçivəsində bərpa işləri, təhlükəsizlik tədbirləri və yeni inkişaf mərhələləri haqqında çıxış edib. O, dağıntıların miqyasının unikal formada ağır olduğunu, prosesin innovativ idarəetmə modeli ilə həyata keçirildiyini bildirib.

Konfransın işində Kənd Təsərrüfatı naziri İnam Kərimov, Təhsil naziri Emin Əmrullayev, Rəqəmsal İnkişaf və Nəqliyyat naziri Rəşad Nəbiyev, İqtisadiyyat nazirinin müavini Sahib Ələkbərov və digər rəsmi şəxslər də çıxış edərək azad edilmiş ərazilərdə kənd təsərrüfatı, təhsil, rəqəmsal infrastruktur və iqtisadiyyatın inkişafı istiqamətində görülən tədbirlər, innovativ yanaşmalar və yeni biznes imkanları barədə məlumat veriblər.

Kiçik və Orta Biznesin İnkişafı Agentliyinin rəhbəri Orxan Məmmədov işğaldan azad olunmuş ərazilərdə biznes qurmaq istəyən sahibkarların müraciətlərindən, investisiya layihələrinin artımından söz açıb. Qarabağ Dirçəliş Fondunun rəhbəri Rəhman Hacıyev isə bölgədə həyata keçirilən bərpa və yenidənqurma layihələri, həmçinin qeyri-hökumət strukturlarının prosesə verdiyi dəstəkdən danışıb.

Sonda Tahir Budaqov Prezident İlham Əliyevi 60 illik yubileyi münasibətilə YAP üzvləri adından təbrik edib və konfrans iştirakçıları tərəfindən dövlət başçısına ünvanlanmış müraciət qəbul olunub. Tədbir “II Qarabağ savaşının yaratdığı geostrateji reallıq” və “Qarabağ və yeni regional iqtisadi mənzərə” mövzularında panel iclaslarla davam edib.