Milli Məclisdə “Qanunvericilikdə qadın sahibkarlığı: imkan və perspektivlər” mövzusunda ictimai dinləmə keçirilib

Bu gün Azərbaycanda Qadın Sahibkarlığının İnkişafı Assosiasiyasının (AQSİA) təşəbbüsü ilə Milli Məclisdə “Qanunvericilikdə qadın sahibkarlığı: imkan və perspektivlər” mövzusunda ictimai dinləmə təşkil olunub.

Tədbirdə Milli Məclisin Ailə, Qadın və Uşaq Məsələləri üzrə Komitəsinin sədri Hicran Hüseynova, İqtisadi Siyasət, Sənaye və Sahibkarlıq Komitəsinin sədri Tahir Mirkişili, Kiçik və Orta Sahibkarlığın İnkişafı Assosiasiyasının İdarə Heyətinin sədri Orxan Məmmədov, həmçinin AQSİA İdarə Heyətinin sədri Səkinə Babayeva və digər millət vəkilləri iştirak etmişdir.

İctimai dinləmədə sahibkarların qanunvericilikdə qarşılaşdıqları çətinliklər müzakirə olunub. Səkinə Babayeva çıxışında qadın sahibkarları maraqlandıran məsələlər – vergi və gömrük rüsumları, Qadınların Milli Biznes Gündəliyi, kənd təsərrüfatı üzrə sahibkarların problemləri, mənfəət və zərərə təsir edən amillər, ƏDV-nin differensiallaşdırılması, eləcə də Sosial Sahibkarlıq və Korporativ Sosial Məsuliyyət sahəsində qanunvericilikdə dəyişikliklərin zəruriliyi barədə fikir bildirib.

AQSİA, ictimai dinləmənin keçirilməsi üçün şərait yaratdığına görə Milli Məclisin sədri Sahibə Qafarovaya təşəkkürünü bildirib.