“Həştərxan-Azərbaycan: Qadın Sahibkarlığı” Forumu uğurla baş tutub

AQSİA nümayəndələri və qadın sahibkarlar forumda iştirak ediblər

Oktyabrın 22-24-də Həştərxan şəhərində “Həştərxan-Azərbaycan: Qadın Sahibkarlığı” Forumu keçirilib. Tədbir Azərbaycanda Qadın Sahibkarlığının İnkişafı Assosiasiyasının (AQSİA) təşəbbüsü ilə, Azərbaycan Respublikasının Ailə, Qadın və Uşaq Problemləri üzrə Dövlət Komitəsinin dəstəyi və Azərbaycan İxracın və İnvestisiyaların Təşviqi Fondunun (AZPROMO) təşkilati dəstəyi ilə reallaşıb.

Forumda Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Sahibkar Qadınlar Assosiasiyasının İdarə Heyətinin sədri Səkinə Babayeva, AQSİA-nın icraçı direktoru Təranə Məmmədova, Nərimanov Rayon İcra Hakimiyyəti başçısının müavini İradə Mahmudova, Həştərxan hökumətinin beynəlxalq və xarici-iqtisadi əlaqələr naziri Denis Afanasyev və AQSİA-nın fəal üzvü olan qadın sahibkarlar iştirak ediblər.

Forum iştirakçıları əvvəlcə ümummilli lider Heydər Əliyevin adını daşıyan parkda abidəsini ziyarət edərək önünə gül dəstələri qoyublar və parkda ağac əkiblər. Sonra Azərbaycan nümayəndə heyətinin üzvlərini Həştərxan vilayəti qubernatorunun vəzifəsini icra edən Sergey Morozov qəbul edib. Görüş zamanı Azərbaycan və Həştərxan vilayəti arasında iqtisadi-siyasi və humanitar sahələrdə mövcud sıx əlaqələr vurğulanıb.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Forum çərçivəsində həyata keçirilən sosial layihələrdən danışaraq, Həştərxan şəhərində Ulu Öndərin xatirəsinə abidə, park, yenidən qurulmuş məktəb binası, müasir uşaq bağçası, “Azərbaycan-Rusiya Dostluq Körpüsü” və digər sosial obyektlərin açılışını xatırladıb.

Həştərxan vilayəti qubernatorunun vəzifələrini icra edən Sergey Morozov qadın sahibkarlar forumunun Azərbaycan-Həştərxan əlaqələrinin inkişafına dəyərli töhfə verəcəyini vurğulayıb. Həştərxan vilayət Dumasının deputatı İrina Brıntseva isə qadınların ictimai-siyasi həyatda və sahibkarlıq fəaliyyətində rolunun önəmini qeyd edib.

Forum çərçivəsində sərgidə Bakı Tekstil Fabrikası, Adeste Group, Nərgiz Klinikası, Buta Glass, Ağ Naftalan, Girdiman Şirkəti, Karvan-L, AftF Consulting, “Loqos” Psixoloji və Nitq İnkişaf Mərkəzi, Naigin K “Tovuz Baltiya”, Milli Azərbaycan Geyimi, Asena, Gazelli Group, Qədim Quba, ABAD, H2A- Group of Company və digər şirkətlər iştirak edərək məhsullarını nümayiş etdiriblər.

Tədbirdə Azərbaycan və Həştərxan vilayətindən təxminən 350 qadın sahibkar iştirak etmiş, forum çərçivəsində işgüzar görüşlər, ustad dərsləri, biznes layihələrin təqdimatı və digər müxtəlif tədbirlər keçirilib.