AQSİA İdarə Heyətinin sədri Səkinə Babayeva Özbəkistan-Azərbaycan Regionlararası Forumunda iştirak edib

Daşkənddə keçirilən forum iki ölkə arasında iqtisadi əməkdaşlığın və qadın sahibkarlığının inkişafında yeni istiqamətləri müəyyənləşdirib

Daşkənddə Özbəkistanın İnvestisiyalar, Sənaye və Ticarət Nazirliyi, Azərbaycanın İqtisadiyyat Nazirliyi və AZPROMO-nun təşkilatçılığı ilə 1-ci Özbəkistan-Azərbaycan Regionlararası Forumu keçirilib. Tədbirdə hər iki ölkədən rəsmi nümayəndələr və iş adamları iştirak ediblər. Forumun açılışında Özbəkistanın xarici işlər naziri Baxtiyor Sayidov və Azərbaycanın iqtisadiyyat naziri Mikayıl Cabbarov iki ölkə arasında inkişaf edən əlaqələrin əhəmiyyətini vurğulayıblar.

AQSİA İdarə Heyətinin sədri Səkinə Babayeva çıxışında assosiasiyanın Özbəkistanla əməkdaşlıq istiqamətləri barədə məlumat verib və qadın sahibkarların qarşılıqlı maraqlarını qeyd edib. O, həmçinin üç əsas istiqamət üzrə – zərgərlik məhsullarının satışının genişləndirilməsi, tekstil sahəsində təcrübə mübadiləsinin artırılması və assosiasiyalar arasında institusional əməkdaşlığın gücləndirilməsi – fəaliyyət planının müzakirə olunduğunu bildirib. Forum iki ölkə arasında iqtisadi və sosial tərəfdaşlığın daha da dərinləşməsinə xidmət edir.