Azərbaycandakı Fövqəladə və Səlahiyyətli Səfiri Zati-aliləri cənab Məhəmməd Əl Bluşi ilə görüş

“Azərbaycanda Qadın Sahibkarlığının İnkişafı Assosiasiyası” İctimai Birliyinin nümayəndə heyəti Birləşmiş Ərəb Əmirliklərinin (BƏƏ) Azərbaycandakı Fövqəladə və Səlahiyyətli Səfiri Zati-aliləri cənab Məhəmməd Əl Bluşi ilə görüş keçirmişdir.

Görüş zamanı qadın sahibkarların iqtisadi fəaliyyətə cəlb olunması, onların təşəbbüslərinin dəstəklənməsi, təcrübə və informasiya mübadiləsi, həmçinin iki ölkənin qadın sahibkarları arasında birgə təşəbbüslərin həyata keçirilməsi imkanları müzakirə olunmuşdur.

Assosiasiyanın sədri Səkinə Babayeva BƏƏ-nin qadınların iqtisadi sahədə təşviqi və dəstəklənməsi istiqamətində qazandığı uğurları yüksək qiymətləndirmiş və bu təcrübənin Azərbaycan qadın sahibkarlarının inkişafı üçün dəyərli ola biləcəyini qeyd etmişdir.

Zati-aliləri cənab Məhəmməd Əl Bluşi Azərbaycan və BƏƏ arasında səmərəli əməkdaşlığın mövcud olduğunu vurğulayaraq, bu əməkdaşlığın qadın sahibkarlığı sahəsində də genişlənməsinin vacibliyini bildirmişdir.

Tərəflər arasında aparılan konstruktiv müzakirələr nəticəsində gələcəkdə qarşılıqlı forumlar, təlimlər, işgüzar səfərlər və birgə layihələrin təşkili məsələləri üzrə ilkin razılıqlar əldə olunmuşdur.

“Azərbaycanda Qadın Sahibkarlığının İnkişafı Assosiasiyası” bu görüşü ölkələrimiz arasında qadın sahibkarlığı sahəsində əməkdaşlığın inkişafına töhfə verəcək mühüm bir addım kimi qiymətləndirir və bundan sonra da fəal əməkdaşlığı davam etdirməyə hazır olduğunu bildirir.