AQUPDK Ermənistanın hərbi təxribatlarına qarşı vətəndaşları birlik çağırışına səsləyib

AQSİA-nın sədri Səkinə Babayeva assosiasiyanın mövqeyini açıqlayıb

İyulun 21-də Ailə, Qadın və Uşaq Problemləri üzrə Dövlət Komitəsi (AQUPDK) onlayn tədbir keçirərək Ermənistanın hərbi təxribatları ilə bağlı vətəndaşlara çağırış edib.

Tədbirdə Komitə sədri Bahar Muradova Ermənistanın Azərbaycan-Ermənistan dövlət sərhədinin Tovuz rayonu istiqamətində törətdiyi hərbi təxribatlardan danışaraq, düşmənin iyulun 12-dən başlayaraq hərbi təxribatlar törətdiyini və bu hərəkətlərin Cenevrə Konvensiyasının pozulması olduğunu vurğulayıb. Sədr bildirib ki, Azərbaycan Ordusu düşmənə layiqli cavab verib və hər bir vətəndaş Azərbaycan mövqeyinin müdafiəsində birlik nümayiş etdirməlidir.

Videokonfrans zamanı Azərbaycanda Qadın Sahibkarlığının İnkişafı Assosiasiyasının (AQSİA) sədri Səkinə Babayeva çıxış edərək assosiasiyanın və üzv qadın sahibkarların mövqeyini açıqlayıb. S.Babayeva qeyd edib ki, AQSİA-nın üzvləri Azərbaycan Respublikasının Birinci vitse-prezidenti Mehriban Əliyevanın bəyanatındakı fikirləri tam dəstəkləyir, ölkəmizin və xalqımızın birliyinin qorunmasının ən vacib prioritet olduğunu vurğulayıblar.

Tədbir çərçivəsində iştirakçılar həm də sayıq olmağa, dezinformasiyalara yol verməməyə və milli birliyi qorumağa çağırılıb.