“Üfüqdə yeni fürsətlər: Qadın sahibkarlara yaşıl işıq” – II Qlobal Sahibkarlıq Forumu keçirilib

Azərbaycan qadın sahibkarlarının imkanlarının artırılması və biznes təşəbbüskarlığının dəstəklənməsi məqsədilə geniş tədbir təşkil olunub

Noyabrın 18-də Ailə, Qadın və Uşaq Problemləri üzrə Dövlət Komitəsi və Azərbaycanda Qadın Sahibkarlığının İnkişafı Assosiasiyası birgə Qlobal Sahibkarlıq Həftəsinin qeyd olunmasına həsr edilmiş “Üfüqdə yeni fürsətlər: Qadın sahibkarlara yaşıl işıq” mövzusunda II forum keçiriblər.

Forumda Assosiasiyanın idarə heyətinin sədri Səkinə Babayeva ölkədə qadın sahibkarlarının biznes imkanlarının artırılması istiqamətində həyata keçirilən layihələr barədə danışıb. Qeyd olunub ki, Assosiasiya fəaliyyətinin ilk ilində 208, 2019-cu ildə isə 273 tədbir təşkil etmiş, Bakıda İqtisadiyyat Nazirliyinin Sahibkarlığın İnkişaf Fondu ilə başlayan sərgiləri isə dövlət və özəl qurumlarla əməkdaşlıq çərçivəsində davam etdirir.

Baş Nazir müavini Əli Əhmədov forumda çıxış edərək bildirib ki, iqtisadiyyatın imkan verdiyi çərçivədə insanların rifahının artırılması istiqamətində addımlar atılır və qadın sahibkarlığının inkişafı prioritetdir. O vurğulayıb ki, qadınların iqtisadi fəallığı həm məşğulluğun təmin olunmasına, həm də ölkə iqtisadiyyatına töhfəyə xidmət edir.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova qeyd edib ki, ölkədə qadın sahibkarların sayı ildən-ilə artır və onların peşə-ixtisas kurslarına cəlb olunması, yeni bazarlara çıxış imkanlarının yaradılması vacibdir. Hazırda Azərbaycanın 8 rayonunda fəaliyyət göstərən Qadın-Resurs mərkəzləri vasitəsilə 145 qadın şəxsi biznesini qurub və 6500-dən çox üzvü olan güclü qadın şəbəkəsi formalaşıb.

İqtisadiyyat nazirinin müavini Niyazi Səfərov forum iştirakçılarını məlumatlandıraraq bildirib ki, Azərbaycanda hüquqi şəxs yaratmadan sahibkarlıqla məşğul olan qadınların sayı 200 minə yaxındır və Sahibkarlığın İnkişafı Fondunun güzəştli kredit mexanizmlərindən 4300-dək qadın faydalanıb, 115 milyon manatdan çox vəsait əldə edib.

Forum çərçivəsində “Uğurlu qadınların hekayəsi”, “İncəsənətdə sahibkarlığın inkişafı”, “Azərbaycanda turizm biznesi/evdə məşğulluğun inkişafı”, “Biznes fəaliyyəti olan qadınlar: üstünlüklər, çətinliklər və imkanlar”, “Azərbaycanda sahibkarlığın təşviqində biznes təhsilin rolu” və “Bankların qadınlara göstərdiyi dəstək mexanizmləri” mövzularında panel müzakirələr aparılıb.

Sonda Assosiasiyada fəaliyyətinə görə Gülnarə Xəlilova, Kəmalə Məmmədli, Sevda Nəcəfova, Məlahət Qəhrəmanova, digər komissiya rəhbərləri və üzvlər mükafatlandırılıb. Eyni zamanda forum çərçivəsində qadınların əl işlərindən ibarət “Əl Əməyi Göz Nuru” sərgisi təşkil olunub.

Forumun davamı olaraq noyabrın 19-da Land Mark otelində Marketing, Sahibkarlıq Psixologiyası və Şirkətlərin maliyyə sisteminin check-up-ı mövzularında seminar keçirilib, 50-yə yaxın qadın iştirak edib.

Forumun təşkilində və təlimlərin keçirilməsində Kapital Bank, Rabitə Bank, Azərsun Holding, 166 Yük Taksi, Logix, Loqos Psixoloji Nitq və İnkişaf Mərkəzi və Qadınların İqtisadi Marifləndirilməsinə Dəstək İB-yə xüsusi təşəkkür ifadə olunub.