Gülnarə Xəlilova “Ən yaxşı vətənpərvər tədqiqatçı alim” mükafatına layiq görüldü

AQSİA-nın Sosial işlər komissiyasının rəhbəri milli geyim mədəniyyəti üzrə elmi fəaliyyətinə və milli dəyərlərin təbliğinə görə diplom və qızıl medalla təltif edilib

“Avropa Nəşr Mətbuat Evi”nin Mükafat Komissiyasının qərarı ilə Azərbaycan Milli Geyim Mərkəzinin rəhbəri, sənətşünaslıq üzrə fəlsəfə doktoru, Azərbaycanda Qadın Sahibkarlığının İnkişafı Assosiasiyasının (AQSİA) Sosial işlər komissiyasının rəhbəri Gülnarə Xəlilova “Ən yaxşı vətənpərvər tədqiqatçı alim” diplomu və qızıl medalı ilə mükafatlandırılıb.

Mükafat ona milli-mənəvi dəyərlərin qorunması istiqamətində göstərdiyi səmərəli fəaliyyətə, cəmiyyətdəki fəal ziyalı mövqeyinə, Azərbaycanın qədim geyim mədəniyyəti, milli geyim formaları və növləri, müasir folklor qruplarında geyim ənənələrinin formalaşması, milli geyimlərin təkmilləşdirilməsi sahəsində apardığı elmi tədqiqatlara görə təqdim olunub. Bununla yanaşı, Gülnarə Xəlilovanın beynəlxalq etno-mədəni festivallarda mütəmadi iştirakı, elmi-publisistik əsərləri, gənclərdə vətənpərvərlik hisslərinin gücləndirilməsinə verdiyi töhfələr və sənətşünaslıq elminin inkişafına xidmətləri də yüksək qiymətləndirilib.

Mükafatı “Avropa Nəşr Mətbuat Evi”nin nümayəndəsi Sahilə Mirzəqızı təqdim edib.

Qeyd edək ki, bu nüfuzlu mükafata əvvəlki illərdə də Azərbaycan mədəniyyət və incəsənətinin tanınmış simaları – Azərbaycan Milli İncəsənət Muzeyinin direktoru, Əməkdar incəsənət xadimi, professor Çingiz Fərzəliyev, Dövlət Akademik Milli Dram Teatrının direktoru, sənətşünaslıq doktoru, professor İsrafil İsrafilov, AMEA-nın müxbir üzvü, Əməkdar incəsənət xadimi, professor Zemfira Səfərova, AMEA Memarlıq və İncəsənət İnstitutunun direktor müavini, Əməkdar incəsənət xadimi, professor Kübra Əliyeva, Dövlət Mədəniyyət və İncəsənət Universitetinin kafedra müdiri, professor Aqşin Babayev, Azərbaycan Bəstəkarlar İttifaqının katibi, professor Zemfira Qafarova və digər nüfuzlu şəxslər layiq görülüblər.