Heydər Əliyev Mərkəzində regional inkişaf proqramının icrasına dair panel iclaslar keçirilib

İqtisadiyyat, kənd təsərrüfatı, infrastruktur və maliyyə-bank sektorları üzrə keçirilən panel müzakirələrdə sahibkarların təklifləri dinlənilib

Fevralın 3-də Heydər Əliyev Mərkəzində “Azərbaycan Respublikası regionlarının 2019–2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunmuş konfrans çərçivəsində müxtəlif istiqamətlər üzrə panel iclaslar keçirilib.

İqtisadiyyat paneli

İqtisadiyyat panelində İqtisadiyyat naziri Mikayıl Cabbarov, Əmək və Əhalinin Sosial Müdafiəsi naziri Sahil Babayev, Dövlət Gömrük Komitəsinin sədri Səfər Mehdiyev, Azərbaycanda Qadın Sahibkarlığının İnkişafı Assosiasiyasının (AQSİA) İdarə Heyətinin sədri Səkinə Babayeva, bir sıra rayon icra hakimiyyəti başçıları və sahibkarlar iştirak ediblər.

Panel zamanı ölkədə həyata keçirilən iqtisadi islahatlar, sahibkarlığın inkişafı, vergi və gömrük sahəsində yeniliklər, rəqabət mühitinin təkmilləşdirilməsi, məşğulluq və sosial müdafiə üzrə görülən işlərlə bağlı məlumat verilib. Qarşılıqlı müzakirələr şəraitində keçirilən iclasda sahibkarlar investisiya layihələrinin maliyyələşdirilməsi, KOB-ların güzəştli kredit resurslarına çıxış imkanlarının genişləndirilməsi, özəlləşdirmə, ixrac, lisenziyalaşdırma və idxalda mövcud güzəştlərlə bağlı təkliflərini səsləndiriblər.

Kənd təsərrüfatı paneli

Kənd təsərrüfatı üzrə panel iclasında aqrar istehsal və suvarma sistemlərində mütərəqqi texnologiyaların tətbiqi, iqlim dəyişikliklərinin təsirləri, ekoloji təmiz məhsul istehsalının genişləndirilməsi və kənd təsərrüfatı təyinatlı torpaqların səmərəli istifadəsi müzakirə olunub. Həmçinin təkrar əkinin subsidiyalaşdırılması, aqrar sektorda sertifikatlaşdırma və digər aktual məsələlər ətrafında fikir mübadiləsi aparılıb.

Paneldə Ekologiya və Təbii Sərvətlər naziri Muxtar Babayev, Kənd Təsərrüfatı naziri İnam Kərimov, Qida Təhlükəsizliyi Agentliyinin sədri Qoşqar Təhməzli, “Azərbaycan Meliorasiya və Su Təsərrüfatı” ASC-nin sədri Əhməd Əhmədzadə və digər qurumların nümayəndələri çıxış edərək sahibkarların suallarını cavablandırıblar.

İnfrastruktur paneli

Nəqliyyat, Rabitə və Yüksək Texnologiyalar naziri Ramin Quluzadə, “Azərbaycan Dəmir Yolları” QSC-nin sədri Cavid Qurbanov, “Azərbaycan Avtomobil Yolları” Dövlət Agentliyinin İdarə Heyətinin sədri Saleh Məmmədov, “Azərişıq” ASC-nin sədri Vüqar Əhmədov, “Azərsu” ASC-nin sədri Qorxmaz Hüseynov, “Azəriqaz” İB-nin baş direktoru Ruslan Əliyev və digər qurum nümayəndələrinin iştirakı ilə keçirilən infrastruktur panelində 2019-cu ildə həyata keçirilmiş layihələr barədə məlumat verilib.

Sahibkarlar kommunal xidmətlər, infrastruktur layihələrində iştirak imkanları, göstərilən xidmətlərin keyfiyyəti və qarşılaşdıqları çətinliklərlə bağlı müraciətlərini səsləndiriblər.

Maliyyə-bank paneli

Maliyyə-bank panel iclasında Mərkəzi Bankın sədri Elman Rüstəmov, İpoteka və Kredit Zəmanət Fondunun İdarə Heyətinin sədri Fəxri Kazımov, Əmanətlərin Sığortalanması Fondunun İcraçı direktoru Vüqar Abdullayev, Sahibkarlığın İnkişafı Fondunun rəhbərliyinin nümayəndələri, Aqrar Kredit və İnkişaf Agentliyinin sədri Mirzə Əliyev, bank sektorunun təmsilçiləri və sahibkarlar iştirak ediblər.

Müzakirələr zamanı sahibkarlar maliyyə resurslarına çıxış imkanlarının genişləndirilməsi, güzəştli kreditlər üçün girov mexanizmlərinin təkmilləşdirilməsi, borcların restrukturizasiyası, ixrac əməliyyatlarında daha əlverişli valyuta rejiminin tətbiqi, avadanlıqlar üzrə güzəştlərin verilməsi və digər məsələlərlə bağlı təkliflərini irəli sürüblər.