AQSİA sədri Səkinə Babayeva doğum günündə cəbhəyanı bölgədə səfərdə olub

Erməni terrorundan zərər çəkmiş ailələrə yardım göstərilib

Azərbaycanda Qadın Sahibkarlığının İnkişafı Assosiasiyasının (AQSİA) İdarə Heyətinin sədri, tərəqqi medallı sahibkar Səkinə Babayeva doğum günündə cəbhəyanı bölgəyə səfər edib. Fəal ictimaiyyətçi hesab edir ki, erməni terrorizmindən əziyyət çəkən insanların yanında olmaq hər bir vətəndaşın borcudur.

Səkinə Babayeva və AQSİA-nın İdarə Heyətinin üzvü, İctimaiyyət və KİV-lə Əlaqələr Komissiyasının sədri, Əməkdar jurnalist Mətanət Ağamirli, Azərbaycan-Ermənistan Dağlıq Qarabağ münaqişəsi zəminində zərər çəkmiş əhaliyə yardım məqsədilə Bərdəyə səfər ediblər.

Assosiasiya üzvləri mənfur erməni terrorçuları tərəfindən evləri dağılan və əzizlərini itirən insanlara baş çəkib, şəhid anasını ziyarət edib. AQSİA tərəfindən təşkil olunan yardım paketləri evləri dağılan ailələrə təqdim olunub, qalan hissəsi isə rayon mərkəzi yardım fonduna təhvil verilib.

Səfər zamanı Murov yüksəkliyinin alınmasında qəhrəmanlığı ilə fərqlənmiş 27 yaşlı şəhid Naibov Devranın anası Mirzəyeva Xuraman Assosiasiya rəhbərinə və üzvlərinə qadın həmrəyliyinə görə təşəkkürünü bildirib. Şəhid anası oğlunun qisasının alınmasının tək yolunu torpaqlarımızın işğaldan azad olunmasında gördüyünü vurğulayıb: “Vətən sağ olsun.”