Bakı Mühəndislik Universitetində “Sabahın Qadın Sahibkarları” layihəsi çərçivəsində görüş keçirilib
November 12, 2025“Kiçik sahibkarlığa dəstək” mövzusunda konfrans və sərgi-satış yarmarkası keçirilib
November 12, 2025AQSİA nümayəndələri Lahıcda “Qan bizim hamımızı birləşdirir” adlı xeyriyyə tədbirində iştirak ediblər
Hər il dünya ölkələri 14 iyun tarixini Ümumdünya Qan Donoru Günü kimi qeyd edir. Bu günün qeyd olunması 2005-ci ildə Ümumdünya Səhiyyə Təşkilatının (ÜST) 58-ci Assambleyasında qəbul edilmiş qətnaməyə əsaslanır. Qətnaməyə görə, hər ilin 14 iyun tarixi – qan qruplarını kəşf edən avstriyalı alim Karl Lanşteynerin doğum günü – könüllü qan donorluğuna dəstəyin artırılması məqsədilə Ümumdünya Qan Donoru Günü kimi qeyd olunur.
Bu günün keçirilməsində məqsəd qan verən insanlara təşəkkürün ifadə olunması, könüllü donorların əməyinə hörmət və ehtiramın göstərilməsi, cəmiyyətdə donor qanının əhəmiyyətinin vurğulanması və yeni insanların donorluğa cəlb edilməsidir.
Bu münasibətlə 10 iyun tarixində İsmayıllı rayonunun Lahıc kəndində könüllü və təmənnasız daimi qan donorları üçün “Qan bizim hamımızı birləşdirir” adlı tədbir keçirilib. Tədbirdə Azərbaycanda Qadın Sahibkarlığının İnkişafı Assosiasiyasının (AQSİA) sədri Səkinə Babayeva, Assosiasiyanın fəal üzvü, tanınmış modelyer-dizayner, sənətşünaslıq üzrə fəlsəfə doktoru Gülnarə Xəlilova, “Nagin K Tovuz Baltiya” MMC-nin direktoru Günel Məmmədhəsənova və AQSİA-nın təsisçilərindən biri Cəmilə Abdullayeva iştirak ediblər.
Qan xeyriyyəçiləri ilə görüşdə çıxış edən Səkinə Babayeva qadın donorların sosial fəallığını yüksək qiymətləndirib, onların cəmiyyət üçün gördükləri xeyirxah işlərin vacibliyini vurğulayıb. O, donorlar arasında fəaliyyət göstərən kiçik sahibkar xanımlara qadın sahibkarlığının dəstəklənməsi məqsədilə AQSİA-nın fəaliyyətinə qoşulmağı tövsiyə edib.
Tədbir sonunda Bakı Tekstil Fabrikinin məhsullarından ibarət hədiyyə paketləri donor qadınlara təqdim olunub və onlar təşəkkürnamələr ilə təltif ediliblər.
Qeyd edək ki, tədbir Qan Donorları Assosiasiyasının təşkilatçılığı, Azərbaycan Qızıl Aypara Cəmiyyəti Nizami Rayon Bölməsi, Azərbaycanda Qadın Sahibkarlığının İnkişafı Assosiasiyası (AQSİA), G&O Travel MMC və Bakı Tekstil Fabrikinin dəstəyi ilə həyata keçirilib.
