Bilik Fondu və AQSİA arasında əməkdaşlığa dair Niyyət Protokolu imzalanıb

Protokol ölkə əhalisinin iqtisadi maarifləndirilməsi və qadın sahibkarların bacarıqlarının inkişafına dəstək məqsədi daşıyır

Azərbaycan Respublikasının Prezidenti yanında Bilik Fondu və Azərbaycanda Qadın Sahibkarlığının İnkişafı Assosiasiyası (AQSİA) arasında əməkdaşlığa dair Niyyət Protokolu imzalanıb.

Fondun icraçı direktoru Oktay Səmədov qeyd edib ki, protokolun imzalanması və əməkdaşlığa başlanılması təşəbbüsü Assosiasiya və Bilik Fondu əməkdaşlarının iştirakı ilə keçirilmiş görüşlərdə maarifləndirici tədbirlərin birgə təşkili və mütəmadi fikir mübadiləsinin nəticəsi olaraq irəli sürülüb. O, sənədin ölkə əhalisinin maarifləndirilməsi sahəsində qarşılıqlı əməkdaşlıq cəhdlərinin dəstəklənməsi və inkişaf etdirilməsinə xidmət etdiyini vurğulayıb.

AQSİA-nın İdarə Heyətinin sədri Səkinə Babayeva çıxış edərək, protokolda əksini tapan müddəaların həyata keçirilməsi istiqamətində səylə çalışmağa hazır olduqlarını bildirib. O, rəhbərlik etdiyi qurumun potensialından yararlanaraq ictimaiyyətin iqtisadi baxımdan maarifləndirilməsi işinə töhfə verəcəklərini qeyd edib.

Səkinə Babayeva əlavə edib ki, Azərbaycan Respublikasının milli iqtisadiyyat perspektivi üzrə Strateji Yol Xəritəsində əksini tapan tələblərə uyğun fəaliyyət göstərirlər və Bilik Fondu ilə əməkdaşlıq çərçivəsində qadınların bacarıqlarının müxtəlif istiqamətlərdə düzgün yönləndirilməsinə dəstək verə biləcəklərinə əmindir.

Protokola uyğun olaraq birgə fəaliyyət proqramının hazırlanması qərara alınıb.