Bakıda “Çağırışın 17 siması” Fotosərgisi Açılıb

Sərgi Dayanıqlı İnkişaf Məqsədləri və Azərbaycan qadınlarının rolunu önə çıxarır

Oktyabrın 28-də Heydər Əliyev Mərkəzində BMT-nin Cenevrə bölməsinin baş direktoru Tatyana Valovayanın təşəbbüsü ilə, Heydər Əliyev Fondunun və İsveçrə Qadın və Gücləndirmə Assosiasiyasının (Association of Swiss Women & Empowerment) dəstəyi ilə “Çağırışın 17 siması” (“17 Faces of Action”) adlı fotosərgi açılıb.

Sərgidə Azərbaycan Qadın Sahibkarlığının İnkişafı Assosiasiyası (AQSİA) İdarə Heyətinin sədri Səkinə Babayeva da iştirak edib. Açılış mərasimində çıxış edən Tatyana Valovaya sərginin reallaşdırılması prosesindən danışaraq bildirib ki, sərgi Dayanıqlı İnkişaf Məqsədlərini özündə təcəssüm etdirir. O, Azərbaycanın bu təşəbbüsə cavab verən ilk ölkə olduğunu vurğulayıb və sərginin simvolik əhəmiyyətini qeyd edib.

“Dayanıqlı İnkişaf Məqsədlərinin təbliğində çox fəal olan 17 Azərbaycan qadını daha ədalətli dünyanın yaradılmasında yaxından iştirak edir. Ümidvarıq ki, bu təşəbbüs digər ölkələr tərəfindən də reallaşdırılacaq. Sərginin təşkilinə verdiyi dəstəyə görə Azərbaycan Prezidenti İlham Əliyevə, Birinci vitse-prezident Mehriban Əliyevaya və Heydər Əliyev Fonduna təşəkkürümü bildirirəm,” – deyə Tatyana Valovaya qeyd edib.

Layihə ilk dəfə Azərbaycanda həyata keçirilib və 2022-2023-cü illər ərzində dünyanın daha 16 ölkəsində reallaşdırılacaq. Hər ölkədən Dayanıqlı İnkişaf Məqsədlərinə uyğun gələn 17 qadın seçiləcək. Milli sərgilərdən sonra 2023-cü ildə İsveçrənin Cenevrə şəhərindəki Millətlər Sarayında (Palais des Nations) 17 ölkənin seçilmiş qadınlarının iştirakı ilə beynəlxalq sərgi keçiriləcək.