Hindistan və Azərbaycan hazır geyim sənayesi üzrə hibrid vebinar keçirib

Tədbirdə AQSİA rəhbərliyi və Azərbaycan tekstil şirkətləri iştirak edib

Hindistanın Bakıdakı Səfirliyi, Hindistan Geyim İxracının Təşviqi üzrə Şura (AEPC) ilə birlikdə hazır geyim sənayesi üzrə hibrid vebinar təşkil edib. Tədbir Hindistanın müstəqilliyinin 75-ci illiyi münasibətilə keçirilən tədbirlərin bir hissəsi olub.

Vebinarda Azərbaycanda İxracın və İnvestisiyanın Təşviqi Fondunun (AZPROMO) nümayəndələri, Azərbaycan Tekstil İstehsalçıları və İxracatçıları Assosiasiyasının üzvləri, eləcə də aparıcı pərakəndə geyim şirkətlərinin nümayəndələri iştirak edib.

Hindistan Geyim İxracının Təşviqi Şurasının sədri Dr. A. Sakthivel çıxış edərək Hindistanın geyim sənayesinin gücünü və sahədə mövcud dövlət proqramlarını təqdim edib. Vebinar iştirakçıları həmçinin AEPC-nin virtual platforması ilə tanış olublar.

Hindistanın Bakıdakı səfiri B. Vanlalvavna çıxışında Hindistanla Azərbaycan arasında iqtisadi əməkdaşlığı şaxələndirmək üçün geniş imkanların olduğunu vurğulayıb. O bildirib ki, Hindistanın hazır geyimləri Azərbaycanda həm yerli sahibkarlar, həm də dünya franşizaları vasitəsilə artıq geniş tanınıb və bazar payının artırılması üçün böyük potensial mövcuddur.

Tədbir çərçivəsində iştirakçılar Hindistanlı həmkarları ilə faydalı müzakirələr aparıb və gələcək əməkdaşlıq imkanlarını müzakirə ediblər.

Statistik məlumatlara görə, 2021-ci ilin yanvar-avqust ayları üzrə Hindistan və Azərbaycan arasında ikitərəfli ticarət dövriyyəsi 588,9 milyon ABŞ dolları təşkil edib ki, bu da ötən il ilə müqayisədə 17,6% artım deməkdir. Azərbaycanın Hindistana ixracı 489,5 milyon ABŞ dolları, Hindistandan idxalı isə 99,4 milyon ABŞ dolları olub.

Vebinarda Azərbaycan Qadın Sahibkarlığının İnkişafı Assosiasiyasının (AQSİA) İdarə Heyətinin sədri Səkinə Babayeva və assosiasiya üzvləri iştirak ediblər.