“Milli KSM Mükafatı 2019”un qalibləri elan edilib

AQSİA və “Proaktiv”in təşkil etdiyi müsabiqədə şirkətlərin sosial məsuliyyət layihələri qiymətləndirilib

Azərbaycanda Qadın Sahibkarlığının İnkişafı Assosiasiyası (AQSİA) və “Proaktiv” şirkətinin birgə təşkil etdiyi **“Milli KSM Mükafatı 2019”**un qalibləri açıqlanıb.

Korporativ sosial məsuliyyət (KSM) layihələrinin təşviqi istiqamətində dövlət siyasətinə və Heydər Əliyev Fondunun həyata keçirdiyi sosial təşəbbüslərə dəstək olaraq keçirilən müsabiqəyə ölkədə fəaliyyət göstərən beynəlxalq və milli şirkətlər son bir ildə icra etdikləri KSM layihələri ilə qatılıblar. Layihələr BMT-nin 17 Dayanıqlı İnkişaf Məqsədi əsas götürülərək yaradılmış komissiya tərəfindən qiymətləndirilib.

Tədbirdə AQSİA-nın İdarə Heyətinin sədri Səkinə Babayeva, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov, “ABAD” publik hüquqi şəxsin direktoru Rüfət Elçiyev, “BP Azerbaijan” şirkətinin əlaqələr, xarici işlər və strategiya üzrə vitse-prezidenti Bəxtiyar Aslanbəyli və digər çıxışçılar ölkədə sahibkarlığın inkişafına göstərilən dövlət dəstəyi, aparılan islahatlar və yaxşılaşdırılan biznes mühiti barədə fikirlərini bölüşüblər.

Çıxışlarda qeyd olunub ki, sahibkarlar mövcud əlverişli şəraitdən istifadə edərək sosial, ekoloji və digər istiqamətlərdə KSM layihələrinə dəstək verməklə dayanıqlı iqtisadi inkişafa və cəmiyyətin rifahının yüksəldilməsinə mühüm töhfə verirlər.

Bildirilib ki, müsabiqənin əsas məqsədi ölkədə sahibkarlar tərəfindən həyata keçirilən KSM layihələrinin sayını artırmaq, bu sahədə nümunəvi fəaliyyət göstərən şirkətləri geniş miqyasda tanıtmaq və təşviq etməkdir.

Müsabiqəyə təqdim olunan layihələr İqtisadiyyat, Əmək və Əhalinin Sosial Müdafiəsi, Təhsil, Ekologiya və Təbii Sərvətlər nazirliklərinin, “ASAN xidmət”in, Ailə, Qadın və Uşaq Problemləri üzrə Dövlət Komitəsinin, Azərbaycan Respublikası Gənclər Təşkilatları Milli Şurasının və Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının nümayəndələri tərəfindən müvafiq meyarlar əsasında qiymətləndirilib.

Tədbir çərçivəsində KSM Türkiyənin qurucusu və KSM Avropanın üzvü Serdar Dinler tərəfindən sahibkarlar üçün “Sosial təsdiq üçün trendlər” mövzusunda seminar təşkil edilib.

Tədbirin sonunda iştirakçılar ilk dəfə təşkil olunan sosial sərgi ilə tanış olublar.