İsmayıllıda “Yaşıl Market” Ticarət Mərkəzinin açılışı olub

Yeni ticarət mərkəzi sakinlərə yüksək səviyyəli xidmət və ucuz məhsullar təqdim edəcək

Sentyabrın 6-da İsmayıllıda “İsgəndər ASA Holdinq Şirkətlər Qrupu” MMC-nin nəzdində fəaliyyətə başlayan “Yaşıl Market” Ticarət Mərkəzinin açılış mərasimi keçirilib. Ticarət mərkəzi 5 hektar ərazini əhatə edir, onun 3 hektarı kənd təsərrüfatı və sənaye mallarının satış bazarına həsr olunub. Burada tikinti materiallarının satış bazarı, avtomobillər üçün 2 dayanacaq, namaz otağı, 22 yerlik otel, 3 yeməkxana və ilkin tibbi xidmət otağı fəaliyyət göstərir.

Rayon icra hakimiyyətinin başçısı Mirdaməd Sadıqov çıxışında ölkəmizin davamlı iqtisadi inkişafından danışaraq ticarət mərkəzinin əhaliyə yüksək səviyyədə xidmət göstərəcəyini və küçə ticarətinin tənzimlənməsinə təsir edəcəyini vurğulayıb.

“İsgəndər ASA Holdinq Şirkətlər Qrupu” MMC-nin vitse-prezidenti Zərifə Quliyeva bildirib ki, mərkəz sakinlərə rahatlıq təmin etmək məqsədilə elektron xidmətlər, pulsuz daşınma və şəhərin müxtəlif istiqamətlərindən 3 avtobusla gediş-gediş imkanları təklif edir. Hazırda mərkəzdə 400-dən çox işçi çalışır, yaxın günlərdə 60 yeni iş yerinin açılması planlaşdırılır.

Açılış mərasimində AMEA-nın şöbə müdiri Rəna Mirzəzadə, Azərbaycanda Qadın Sahibkarlar Assosiasiyasının sədri Səkinə Babayeva və Ekologiya və Təbii Sərvətlər Nazirliyinin sektor müdiri Mehman Nəbiyev çıxış edərək ticarət mərkəzinin fəaliyyətini yüksək qiymətləndirmiş və kollektivlə birlikdə rayon sakinlərini təbrik etmişlər.

Mərkəzdə kənd təsərrüfatı məhsulları digər ticarət obyektlərindən 30-40%, ət məhsulları 10-20%, geyim əşyaları 30% və məktəb ləvazimatları 40% ucuz satılır. Satış qiymətlərinə və sanitar-gigiyenik qaydalara ciddi nəzarət mexanizmi qurulub. Hazırda 70 tonluq soyuducu fəaliyyət göstərir, əlavə olaraq 2 min tonluq soyuducunun quraşdırılması planlaşdırılır.

Açılış mərasimi musiqi proqramı ilə yekunlaşıb.