Bakıda “Beynəlxalq Uşaq Oyuncaqları Sərgisi” keçirilib

AQSİA və AFTF Consulting-in birgə təşkil etdiyi sərgidə yerli və xarici şirkətlərin məhsulları, həmçinin sənətkar qadınların əl işləri nümayiş etdirilib

16–18 dekabr 2019-cu il tarixlərində “Azərbaycanda Qadın Sahibkarlığının İnkişafı Assosiasiyası” (AQSİA) və “AFTF Consulting”in birgə təşkilatçılığı ilə Passage 1901-də “Beynəlxalq Uşaq Oyuncaqları Sərgisi” keçirilib. Üç gün davam edən sərgidə yerli və xarici şirkətlərin məhsulları ilə yanaşı, AQSİA üzvü olan sənətkar qadınların əl işləri də ziyarətçilərə təqdim olunub.

Sərgi AQSİA İdarə Heyətinin sədri Səkinə Babayevanın açılış nitqi ilə başlayıb. S.Babayeva çıxışında belə sərgilərin qadın sahibkarların inkişafında mühüm rol oynadığını vurğulayıb və “gücün qadın birliyində olduğunu” qeyd edib.

Tədbirin əsas məqsədi ölkələr arasında əməkdaşlığın gücləndirilməsi, istehsal yönümlü müəssisələrin sayının artırılması, “Əl Əməyi, Göz Nuru” layihəsi çərçivəsində uşaq geyimləri, oyuncaqlar və əl işlərinin istehsalına dəstək göstərmək, eləcə də evdə məşğulluğun artırılmasına təkan vermək olub.

Sərgidə “Damla Aztəminatlı Ailələrə Qayğı” İctimai Birliyinin təşəbbüsü ilə regionlarda yaşayan uşaqların məktubları da nümayiş etdirilib. Qonaqlar tərəfindən maraqla qarşılanan məktublar oxunub və onların istəklərinin qarşılanması qərara alınıb.

İlk məktubu sərgidə Səkinə Babayeva səsləndirib. O, Oğuz rayonunda yaşayan 13 yaşlı Aysunun bel çantası və çamadan istədiyini bildirərək, balacanın arzusunu öz üzərinə götürdüyünü bildirib.

Digər məktublarda göstərilən arzular da müxtəlif şəxslər tərəfindən qarşılanıb. Belə ki:

• LOQOS Psixoloji Nitq İnkişaf Mərkəzinin rəhbəri Təranə Məmmədova – gəlinciklər,
• EXTREME turizmin rəhbəri Cəmilə Abdullayeva – rəsm alətləri,
• könüllü Tural Quliyev – telefon,
• AFTF Consulting rəhbəri Ələviyyə Həsənova – kitablar,
• ARTMOOD şirkətinin creative direktoru Ülviyyə Mütəllimova – velosiped,

və digər sərgi iştirakçıları Oğuz rayonundakı uşaqlar üçün məktublardakı hədiyyələrin təmin ediləcəyini bildiriblər.

İsmayıllı rayonunda yaşayan uşaqlar üçün isə:

• “Vəfa Ziyalı Qadınlar” İB və Beynəlxalq Qadın Həmrəyliyi Klubunun sədri Əsmayə Cavadova – velosiped,
• ABC tədris mərkəzinin rəhbəri Leyla Həsənova – don, kitab və müxtəlif hədiyyələr,
• ARTMOOD şirkətinin rəhbəri Xəyalə Mütəllimova – velosiped və kitab,
• KOBİA əməkdaşı Aygün Əhmədova – velosiped və bel çantası

və digər iştirakçılar uşaqların arzularını reallaşdırmaq üçün hədiyyələr göndərəcəklər.

Qeyd edək ki, sərgi 18 dekabr 2019-cu il tarixində öz işini yekunlaşdırıb.