“Yerli və Regional İnkişafa Dəstək” Layihəsi Çərçivəsində Qadın Sahibkarlar Təlimlərini Başa Vurdu

AQSİA və GİZ-in birgə təşkilatçılığı ilə qadınların iqtisadi və sosial həyatda iştirakına dəstək konfransı keçirilib

Sentyabrın 10-dan dekabrın 11-ə qədər Gəncə, Şəmkir, Tovuz və Daşkəsən rayonlarında həyata keçirilən “Yerli və Regional İnkişafa Dəstək” layihəsi çərçivəsində qadınların “Sosial-iqtisadi tədbirlərin planlaşdırılmasında və həyata keçirilməsində iştirakına dəstək” layihəsinin bağlanış mərasimi baş tutub.

10-11 dekabr 2018-ci il tarixində Azərbaycanda Qadın Sahibkarlığının İnkişafı Assosiasiyasının (AQSİA) və Almaniya Beynəlxalq Əməkdaşlıq Cəmiyyətinin (GİZ) Azərbaycan nümayəndəliyinin birgə təşkilatçılığı ilə “Qadınların iqtisadi və sosial həyatda iştirakının təşviqi və peşəkar şəbəkələşməsi” layihəsi çərçivəsində konfrans keçirilib. Tədbirdə Daşkəsən, Tovuz və Gədəbəy rayonlarından 60 mikro-sahibkar qadın iştirak edib.

Konfransın ev sahibliyini AQSİA-nın sədri Səkinə Babayeva həyata keçirib, Regionlarla İş üzrə Komissiyanın rəhbəri Kəmalə Məmmədova isə təşkilatçı qismində iştirak edib. Layihə çərçivəsində GİZ-in nümayəndəsi Fidan Qasımova görülən işlər haqqında məlumat verib, Almaniyadan dəvət olunmuş Dorothea Maisch işgüzar qadınların şəbəkələşmə təcrübələrini təqdim edib, Mack Rotraud isə kənd qadınları üçün şəbəkələşmə üzrə uğurlu nümunələri bölüşüb.

Layihə çərçivəsində iştirakçılara biznes planların hazırlanması, maliyyə savadlılığı və şəxsi bacarıqların inkişafı ilə bağlı təlimlər keçirilib. Təlimlərdən uğurla keçmiş 60 sahibkar qadın sertifikatla təltif olunub. AQSİA sədri Səkinə Babayeva bildirib ki, regionlarda qadınların şəbəkələşməsi və bacarıqlarının artırılması assosiasiyanın əsas prioritetlərindən biridir və bu, onların bizneslərini genişləndirməsinə imkan yaradacaq.