“Sahibkarlar Günü”nə həsr olunmuş Konfrans keçirilib

Bakı Biznes Mərkəzində keçirilən tədbirdə sahibkarlığın inkişafı istiqamətində görülən işlər və yeni təşəbbüslər müzakirə olunub

Mayın 25-də Bakı Biznes Mərkəzində İqtisadiyyat Nazirliyinin və Sahibkarlar (İşəgötürənlər) Təşkilatları Milli Konfederasiyasının dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə “Sahibkarlar Günü”nə həsr olunmuş Konfrans keçirilib. Tədbirdə aidiyyəti dövlət qurumlarının, sahibkarların ictimai birliklərinin nümayəndələri, eləcə də müxtəlif sahələrdə fəaliyyət göstərən sahibkarlar iştirak ediblər.

Konfransa qatılanlar əvvəlcə Fəxri Xiyabanda Ümummilli Lider Heydər Əliyevin məzarını ziyarət edib, xatirəsini ehtiramla anaraq abidəsi önünə əklil qoyublar. Həmçinin görkəmli oftalmoloq alim, akademik Zərifə xanım Əliyevanın məzarı ziyarət olunub, abidəsi önünə gül dəstələri düzülüb. Tədbir iştirakçıları daha sonra Şəhidlər Xiyabanına gələrək Azərbaycanın müstəqilliyi və ərazi bütövlüyü uğrunda şəhid olmuş qəhrəmanlarımızın xatirəsini anıblar və “Əbədi Məşəl” kompleksinə əklil qoyublar.

Bakı Biznes Mərkəzinin foyesində sahibkarlığın inkişafı sahəsində fəaliyyət göstərən müxtəlif qurumların — İqtisadiyyat Nazirliyinin Sahibkarlığın inkişafı siyasəti və Sənaye şöbələrinin, Sahibkarlığa Kömək Milli Fondunun, AZPROMO-nun, Azərbaycan İnvestisiya Şirkətinin, sənaye parkları və məhəllələrinin, Kiçik və Orta Sahibkarlığın İnkişafı Agentliyinin, “Təmiz Şəhər” ASC-nin, Sahibkarlar (İşəgötürənlər) Təşkilatları Milli Konfederasiyasının və Azərbaycan Banklar Assosiasiyasının stendləri nümayiş etdirilib.

Stendlərdə sahibkarlığın dəstəklənməsi və inkişafı istiqamətində həyata keçirilən layihələr, biznesə dəstək mexanizmləri və maarifləndirici materiallar təqdim olunub. Müvafiq qurumların nümayəndələri təmsil etdikləri sahələr barədə ətraflı məlumat verib və media nümayəndələrinin suallarını cavablandırıblar.

Konfransda qonaqlar arasında Azərbaycanda Qadın Sahibkarlığının İnkişafı Assosiasiyasının sədri Səkinə Babayeva da iştirak edib. Tədbir çərçivəsində sahibkarlığın inkişafına dair yeni təşəbbüslər, biznes mühitinin daha da yaxşılaşdırılması və sahibkarların fəaliyyətinin stimullaşdırılması istiqamətində təkliflər səsləndirilib.