AQSİA İH sədri Səkinə Babayeva “Türk iş adamları birlikləri ilə əməkdaşlıq” mövzusunda ictimai dinləmədə çıxış edib

KOBİA yanında İctimai Şuranın təşkilatçılığı ilə keçirilən tədbirdə türk və azərbaycanlı sahibkarlar arasında əməkdaşlıq, ticarət və sənaye sahələrində birgə imkanlar müzakirə olunub.

Kiçik və Orta Biznesin İnkişafı Agentliyi (KOBİA) yanında İctimai Şuranın təşkilatçılığı, KOBİA və Azərbaycan Sahibkarlar (İşəgötürənlər) Təşkilatları Milli Konfederasiyasının (ASK) dəstəyi ilə “Türk iş adamları birlikləri ilə əməkdaşlıq” mövzusunda ictimai dinləmə keçirilib.

Tədbirdə Azərbaycanda fəaliyyət göstərən və sıralarında yüzlərlə iş adamını birləşdirən “MÜSİAD Azərbaycan”, Türkiyə-Azərbaycan İş Adamları və Sənayeçiləri İctimai Birliyi (TÜİB), Azərbaycan-Türkiyə İş Adamları Birliyi (ATİB) kimi təşkilatların, biznes assosiasiyaların nümayəndələri və sahibkarlar iştirak ediblər.

Tədbirdə üzv heyəti ilə birlikdə iştirak edən Azərbaycanda Qadın Sahibkarlığının İnkişafı Assosiasiyasının İdarə Heyətinin sədri, ASK Rəyasət Heyətinin üzvü Səkinə Babayeva tərcihli ticarət anlaşması, sahibkarların tekstil sahəsində olan vergi və gömrük problemləri haqqında çıxış edib. Tədbirdə eyni zamanda AQSİA-nın üzvü olan Türkiyəli qadın sahibkarlar və Azərbaycanlı qadın sahibkarlar iştirak edib.

Bundan başqa ictimai dinləmədə türk iş adamları və yerli KOB-lar arasında əməkdaşlığın genişləndirilməsi, hər iki ölkə sahibkarlarının iştirakı ilə birgə təşəbbüs, layihə və tədbirlərin icrası, təcrübə mübadiləsi, yeni əməkdaşlıq istiqamətləri müzakirə olunub, sahibkarların təklifləri dinlənilib, sualları cavablandırılıb.