Səkinə Babayeva tekstil sahəsinin nümayəndələri ilə sektorun inkişaf perspektivlərini müzakirə edib

Görüşdə yerli istehsalın artırılması, texnoloji yeniliklər və qadınların tekstil sənayesində rolunun gücləndirilməsi istiqamətində birgə addımlar razılaşdırılıb

AQSİA İdarə Heyətinin sədri və “Bakı Tekstil Fabriki” MMC-nin təsisçisi Səkinə Babayeva, ölkənin tanınmış tekstil sahəsi nümayəndələri ilə görüş keçirərək, sektordakı mövcud vəziyyət və problemləri müzakirə edib. Görüşdə yerli istehsalın artırılması, keyfiyyətli xammalın təminatı, texnoloji yeniliklərin tətbiqi, qadınların işgüzar fəaliyyətinin artırılması və iş şəraitinin yaxşılaşdırılması məsələləri əsas müzakirə mövzuları olub.

Tekstil sahəsindən olan sahibkarlar tərəfindən tender prosesində şəffaflığın artırılması və yerli istehsalçıların daha geniş iştirakının təmin edilməsi zərurətini vurğulayıb. Onlar, sektorun inkişafı və yerli istehsalçıların beynəlxalq bazarlarda möhkəm mövqe əldə etməsi üçün birgə fəaliyyətin vacibliyini qeyd ediblər. Görüşün sonunda, sektorda qarşılaşılan çətinliklərin aradan qaldırılması üçün birgə addımlar atılacağı qərara alınıb.