Aqrar Biznes Festivallarının yekununa həsr olunmuş tədbir keçirilib

Aqrar Biznes Festivalları kənd təsərrüfatı məhsullarının tanıdılması və brendləşdirilməsinə mühüm töhfə verir
Aqrar Biznes Festivalları kənd təsərrüfatı məhsullarının tanıdılması, yerli istehsalçıların bazara çıxış imkanlarının genişləndirilməsi və brendləşdirilməsi baxımından mühüm platformaya çevrilib.
Festival çərçivəsində keçirilən tədbirdə çıxış edən Azərbaycan Respublikasının Qida Təhlükəsizliyi Agentliyinin sədri Qoşqar Təhməzli, Milli Məclisin Aqrar siyasət komitəsinin sədri Tahir Rzayev, Kiçik və Orta Biznesin İnkişafı Agentliyinin İdarə Heyətinin sədri Orxan Məmmədli, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev, Azərbaycanda Qadın Sahibkarlığının İnkişafı Assosiasiyasının İdarə Heyətinin sədri Səkinə Babayeva, “Caspian Event Organisers” şirkətinin direktoru Bəxtiyar Hidayətzadə və Aqrar İnnovasiya Mərkəzinin direktoru Anar Cəfərov Aqrar Biznes Festivallarının fermerlərin kənd təsərrüfatı istehsalı vasitələrinə, eləcə də güzəştli aqrar kreditlərə çıxış imkanlarının artırılması baxımından əhəmiyyətini vurğulayıblar.
Qeyd olunub ki, Aqrar Biznes Festivalları gələcək illərdə də kənd təsərrüfatının innovativ, rəqabətqabiliyyətli və dayanıqlı inkişafına mühüm töhfələr verməyə davam edəcək.
Bildirilib ki, son illər ərzində ölkənin müxtəlif bölgələrində ümumilikdə 90 Aqrar Biznes Festivalı keçirilib. Onlardan 32-si 2025-ci ildə baş tutub. Bu il təşkil olunan festivallarda ümumilikdə 421 907 nəfər iştirak edib. İştirakçıların 38 492 nəfəri fermer, 383 415 nəfəri isə ziyarətçi olub.
Festivallar çərçivəsində təkcə 2025-ci ildə rayon icra hakimiyyətləri ilə birgə bölgələrdə 19 Məhsul Festivalı təşkil edilib. Gələn il keçiriləcək 19-cu Azərbaycan Beynəlxalq Kənd Təsərrüfatı sərgisi – “Caspian Agro 2026” çərçivəsində məhsul festivallarının keçirildiyi bölgələrin “Azərbaycan pavilyonu” adı altında vahid stendlə təmsil olunması planlaşdırılır.
Aqrar Biznes Festivalları çərçivəsində 2025-ci ildə ölkənin 8 iqtisadi rayonunda 14 toxum sərgi-satış yarmarkası, kredit yarmarkaları, eləcə də “Dəqiq kənd təsərrüfatında süni intellektin tətbiqi” layihəsi çərçivəsində 5 rayonda, o cümlədən Zəngilan rayonu və Xankəndi şəhərində “Bootcamp” proqramları təşkil olunub. Bootcamp proqramlarında süni intellekt ixtisasları üzrə təhsil alan 20-yə yaxın ali təhsil müəssisəsindən 90-a yaxın tələbə iştirak edib.
Aqrar Biznes Festivallarına həsr olunmuş yekun tədbir “Aqrar sahədə dövlət qurumları arasında əməkdaşlıq imkanları” mövzusunda panel müzakirələrlə davam etdiriləcək.