Qusarda qadın sahibkarlar üçün “Yeni fürsətlər və şəbəkələşmə” konfransı keçirilib

AQSİA bölgədə qadın sahibkarlığının inkişafını dəstəkləyir

Qusarda Azərbaycan Respublikasında Qadın Sahibkarlığının İnkişafı Assosiasiyasının (AQSİA) təşkilatçılığı ilə şimal bölgəsində yaşayan qadın sahibkarların şəbəkələşməsi və biznes fəaliyyətlərinin genişləndirilməsi məqsədilə konfrans keçirilib.

“Regionda qadın sahibkarlar üçün yeni fürsətlər və şəbəkələşmənin genişləndirilməsi” mövzusunda keçirilən tədbirdə Qusar, Quba, Xaçmaz və Siyəzən rayonlarından olan sahibkar qadınlar iştirak ediblər. Konfransdan əvvəl Qusar Rayon İcra Hakimiyyətinin başçısı Şair Alxasov ilə AQSİA-nın sədri Səkinə Babayeva arasında bölgədə qadın sahibkarlığının inkişafı ilə bağlı müzakirələr aparılıb.

Tədbirdə bildirilib ki, ölkədə sahibkarlığın inkişafı Prezident İlham Əliyevin iqtisadi strategiyasının prioritetlərindəndir. Dövlət-sahibkar münasibətlərinin təkmilləşdirilməsi, sahibkarlara göstərilən dəstək tədbirləri və investisiya təşviqi proqramları bu sahədə mühüm nailiyyətlərə gətirib çıxarıb.

AQSİA sədri Səkinə Babayeva çıxışında qeyd edib ki, assosiasiyanın əsas hədəfi bölgələrdə qadın sahibkarlığının inkişafı və potensiallarının reallaşdırılmasıdır. O, dövlətin sahibkarlara güzəştli kreditlər, yeni sənaye zonaları, ixrac missiyaları və ticarət evləri vasitəsilə dəstək göstərdiyini diqqətə çatdırıb.

Konfransda AQSİA-nın İdarə Heyətinin üzvləri Jalə Əmirbəyova, Ulduza Xanlarova, Lamiyə Bayramova, Vəsilə Adulova və Rübabə Mürşüdova da çıxış edərək gənc və fəaliyyət göstərən sahibkar qadınların suallarını cavablandırıblar. Tədbir çərçivəsində uğur qazanan qadın sahibkarlar təcrübələrini paylaşaraq, bölgədə qadınların sahibkarlıq imkanlarının genişləndirilməsi üzrə fikir mübadiləsi aparıblar.