“Qızların peşə seçiminə hazırlıq” mövzusunda onlayn maarifləndirmə tədbiri keçirilib

Azərbaycan Respublikası Ailə, Qadın və Uşaq Problemləri üzrə Dövlət Komitəsi, Azərbaycanda Qadın Sahibkarlığının İnkişafı Assosiasiyası (AQSİA) və Təhsil Nazirliyi yanında Peşə Təhsili üzrə Dövlət Agentliyi birgə “Qızların peşə seçiminə hazırlıq” mövzusunda onlayn maarifləndirmə tədbiri təşkil edib. Tədbirdə 1 və 2 saylı Uşaq Evləri, SOS Uşaq Kəndlərinin yuxarı sinif şagirdləri iştirak edib.

Açılış nitqi ilə çıxış edən Dövlət Komitəsinin sədr müavini Sədaqət Qəhrəmanova peşə təhsili və təlimi sahəsinin ölkədə zəngin tarixə malik olduğunu, bu sahədə inkişafı təmin etmək üçün həyata keçirilən dövlət proqramlarını və məqsədyönlü tədbirləri iştirakçıların diqqətinə çatdırıb. O, peşə təhsilinin gənclərin inkişafında əhəmiyyətli rolunu vurğulayıb.

Tədbirdə AQSİA-nın İdarə Heyətinin sədri Səkinə Babayeva və Peşə Təhsili üzrə Dövlət Agentliyinin İşəgötürənlərlə iş və innovativ layihələr şöbəsinin müdir müavini Nigar İsmayılzadə çıxış ediblər. Səkinə Babayeva bildirib ki, peşə sahibi olmaq istəyən gənclərə AQSİA üzvü xanım sahibkarlar müxtəlif biznes sahələrində rəhbərlik edərək təcrübə dəstəyi göstərməyə hazırdır.

Tədbirin sonunda Dövlət Komitəsi tərəfindən şagirdlər arasında keçirilmiş peşə seçimi sorğusu ətrafında müzakirələr aparılıb.