“Sənətkarlıq İncisi – Təkəlduz İrsimiz” layihəsinin bağlanış tədbiri Şəkidə keçirildi

Layihə İsveçrə Əməkdaşlıq Təşkilatının maliyyə dəstəyi və AQSİA-nın təşkilatçılığı ilə həyata keçirilib

09 sentyabr 2021-ci il tarixində Şəki şəhəri Heydər Əliyev Mərkəzində “Sənətkarlıq İncisi – Təkəlduz İrsimiz” layihəsinin bağlanış tədbiri baş tutub. Layihə itirilməkdə və yox olmaq üzrə olan milli sənət nümunələrinin yenidən dirçəldilməsi və yeni nəsilə ötürülməsini hədəfləyib.

Layihə çərçivəsində 50 nəfər gənc qız arasında aparılan sorğu nəticəsində Təkəlduz sənətinə həvəsli olan 20 gənc qız seçilmiş və onlara ustad dərsləri keçirilib. Dərslər zamanı gənc qızlar Təkəlduz sənətinin incəlikləri ilə tanış olublar.

Layihədən gözlənilən nəticələrdən biri çəkiləcək sənədli film vasitəsilə bu sənət haqqında məlumatlılığın geniş kütlə arasında artırılmasıdır. Film həmçinin Azərbaycanın dağlıq turizm yerləri və qədim sənətləri haqqında turistlər üçün məlumat mənbəyi rolunu oynayacaq.

Bundan əlavə, Təkəlduz layihəsi çərçivəsində Şəki-Zaqatala iqtisadi rayonlarında fəaliyyət göstərən sahibkar qadınların regional konfransı təşkil olunub. Konfransda Azərbaycan Qadın Sahibkarlığının İnkişafı Assosiyasının (AQSİA) İdarə Heyətinin sədri Səkinə Babayeva, İsveçrə Əməkdaşlıq Təşkilatının Bakı Ofisinin Milli Proqram Direktoru Zahir Əhmədov, Şəki-Zaqatala regional KOB Dostunun rəhbəri Elburus İsgəndərov və AQSİA-nın fəal üzvü, hüquqşünas-mediator Arzu Alıyeva iştirak ediblər.

Görüş zamanı Arzu Alıyeva qadın sahibkarlara hüquqi məsləhətlər verib və suallarını cavablandırıb. Konfransdan sonra iştirakçılar Təkəlduz nümunələrinə baxış keçiriblər.