Tofiq İsmayılovun 80 illik yubileyi Beynəlxalq Muğam Mərkəzində qeyd edildi

AQSİA üzvü Vəfa İsmayılovanın atası, görkəmli kinorejissor Tofiq İsmayılovun xatirəsi anılıb

Aprelin 21-də Beynəlxalq Muğam Mərkəzində Mədəniyyət Nazirliyinin təşkilatçılığı ilə Azərbaycanda Qadın Sahibkarlığının İnkişafı Assosiasiyasının (AQSİA) üzvü Vəfa İsmayılovanın atası, görkəmli kinorejissor, ssenarist, Xalq artisti və professor Tofiq İsmayılovun 80 illik yubiley gecəsi keçirilib. Tədbirdə Mədəniyyət Nazirliyinin Aparat rəhbəri Fikrət Babayev, AQSİA-nın İdarə Heyətinin sədri Səkinə Babayeva, komissiya rəhbərləri, mədəniyyət və elm xadimləri, ictimaiyyət nümayəndələri iştirak edib.

Tədbiri akademik və millət vəkili Rafael Hüseynov açaraq Tofiq İsmayılovla bağlı xatirələrini bölüşüb. O, sənətkarın həyata bağlı, arzularla yaşayan şəxsiyyət olduğunu, Türkiyədə Memar Sinan Universitetində çalışdığı dövrdə isə Azərbaycan və Türkiyə mədəniyyətini təbliğ edən mühüm layihələr həyata keçirdiyini bildirib. Hüseynov, həmçinin T.İsmayılovun 1971-ci ildə çəkdiyi “Oxuyur Müslüm Maqomayev” filmindən söz açıb və onun kino vasitəsilə zamanın yaddaşını saxladığını vurğulayıb.

Filologiya elmləri doktoru, professor Aqşin Babayev görkəmli kinorejissorla gənclik illərindən tanış olduğunu, dramaturgiya və musiqi dərnəklərində birgə fəaliyyətlərini xatırladığını bildirib.

Azərbaycan Yazıçılar Birliyinin sədri, Xalq yazıçısı Anar çıxışında T.İsmayılovun həm ailə başçısı, həm sənətkar, həm də müəllim kimi əvəzolunmaz işlər gördüyünü və Türkiyədə Azərbaycan mədəniyyətinin tanıdılmasında böyük xidmətlər göstərdiyini qeyd edib.

Türkiyənin Azərbaycandakı səfirliyinin mədəniyyət və tanıtım müşaviri İrfan Çiftçi T.İsmayılovu dəyərli insan və peşəkar rejissor kimi xarakterizə edib, onun sənətsevərlərin yaddaşında unudulmaz bir sənətkar kimi qaldığını bildirib.

Tədbirdə həmçinin Bakı Xoreoqrafiya Akademiyasının rektoru, professor Timuçin Əfəndiyev, kinorejissor, Əməkdar incəsənət xadimi Cəmil Quliyev, Əməkdar artist Ötkəm İsgəndərov və digər çıxışçılar Tofiq İsmayılovla bağlı xatirələrini bölüşüblər. Sənətkarın filmlərindən fraqmentlər və həyatını əks etdirən video-slayd nümayiş olunub. Əməkdar artist İlqar Muradov və estrada müğənnisi Sərxan Sərxan tərəfindən mahnılar ifa edilib.

Tədbirin sonunda mərhumun qızı Sevinc İsmayılova çıxış edərək təşəkkürünü bildirib və yubiley gecəsinin təşkilinə dəstək olanlara minnətdarlığını çatdırıb.

Bu yubiley gecəsi Tofiq İsmayılovun Azərbaycan mədəniyyətində silinməz iz qoymuş sənətkar kimi xatırlanmasını bir daha təsdiqləmiş oldu.