“İnnovativ sahibkarlığın inkişafında dövlətin güzəştli maliyyə dəstəyi” mövzusunda konfrans keçirilib

Səkinə Babayeva qadın sahibkarlığın inkişafında görülən işlər və gələcək əməkdaşlıqlar barədə danışıb

31 iyul 2019-cu il tarixində Bakı Biznes Mərkəzində “İnnovativ sahibkarlığın inkişafında dövlətin güzəştli maliyyə dəstəyi” mövzusunda konfrans təşkil olunub. Tədbir İqtisadiyyat Nazirliyinin təşkilatçılığı ilə baş tutub və dövlət qurumlarının, Azərbaycanda Qadın Sahibkarlığının İnkişafı Assosiasiyasının (AQSİA) İdarə Heyətinin sədri Səkinə Babayeva, Sahibkarlığın İnkişafı Fondu ilə əməkdaşlıq edən müvəkkil kredit təşkilatlarının, ali təhsil müəssisələrinin nümayəndələri, sahibkarlar və startapçılar iştirak ediblər.

Konfransda çıxış edən İqtisadiyyat nazirinin müavini Sahib Məmmədov Azərbaycan Respublikası Prezidentinin rəhbərliyi ilə həyata keçirilən sosial-iqtisadi inkişaf strategiyasına uyğun olaraq özəl sektorun innovativ inkişafı istiqamətində sistemli və ardıcıl tədbirlərin aparıldığını və sahibkarlığın sürətli inkişafının təmin olunduğunu vurğulayıb.

Səkinə Babayeva çıxışında AQSİA-nın Sahibkarlığın İnkişafı Fondu ilə birgə keçirdiyi tədbirlərdən danışıb, gələcək əməkdaşlıqlara dair təkliflərini təqdim edib və bu əməkdaşlıqlardan məmnunluğunu ifadə edib.

Türkiyənin Kiçik və Orta Sahibkarlığın İnkişafı və Dəstəklənməsi Birliyinin (KOSGEB) İdarə Heyətinin sədr müavini Salih Tuna Şahin təşkilatın fəaliyyəti barədə məlumat verərək, İqtisadiyyat Nazirliyinin tabeliyində fəaliyyət göstərən Kiçik və Orta Biznesin İnkişafı Agentliyi və Sahibkarlığın İnkişafı Fondu ilə əməkdaşlıqlarını diqqətə çatdırıb.

Sahibkarlar (İşəgötürənlər) Milli Konfederasiyasının vitse-prezidenti Vüqar Zeynalov özəl sektorun inkişafı istiqamətində Konfederasiyanın gördüyü işlərdən danışıb.

Tədbirin sonunda Sahibkarlığın İnkişafı Fondu ilə əməkdaşlıq edən bir qrup sahibkar müxtəlif nominasiyalar – ixracın və yerli istehsalın inkişafı, sərhədboyu rayonlarda uğurlu fəaliyyət, qadın sahibkarlığın inkişafı, ucqar dağ kəndində fəaliyyət göstərən fermer və ən gənc sahibkar – üzrə diplomlarla təltif olunublar.