Azərbaycanda Qadın Sahibkarlarının Beynəlxalq Əməkdaşlığı Güclənir
November 12, 2025AQSİA rəhbərliyi Tovuzda sahibkar qadınların istehsal müəssisələri ilə tanış olub
November 12, 2025“Əl əməyi, göz nuru” satış sərgisi qadın sahibkarların fəaliyyətinə dəstək məqsədilə təşkil olunub
26 avqust tarixində Bakıda “Əl əməyi, göz nuru” adlı qadınların əl işlərindən ibarət satış sərgisi keçirilib. Tədbir Azərbaycanda Qadın Sahibkarlığının İnkişafı Assosiasiyası (AQSİA) tərəfindən təşkil olunub və sərgidə həm əl işləri, həm də sahibkar qadınlara məxsus müəssisələrdə istehsal olunan məhsullar nümayiş etdirilib. Açılış mərasimində dövlət qurumları, səfirliklər, gənclər və beynəlxalq təşkilatların nümayəndələri iştirak ediblər.
AQSİA-nın sədri Səkinə Babayeva bildirib ki, sərginin keçirilməsində məqsəd ölkədə fəaliyyət göstərən 100-dən çox qadın sahibkarın fəaliyyətinə dəstək göstərməkdir. Prezident İlham Əliyevin sahibkarlığın inkişafına diqqəti və Birinci vitse-prezident Mehriban Əliyevanın qadınların cəmiyyətdə rolunun artırılması sahəsindəki fəaliyyəti Azərbaycan xanımlarına sahibkarlıq bacarıqlarını nümayiş etdirmək imkanı yaradır.
Tədbirdə çıxış edənlər arasında Aqro Mall-ın direktor müavini Aydın Nəsirov, AZPROMO-nun rəhbəri vəzifəsini icra edən Yusif Abdullayev, Moldova səfirliyinin nümayəndəsi Alla Leuqa və Azərbaycan Turizm Assosiasiyasının icraçı direktoru Ənvər Qurbanov yer alıb. Onlar qadın sahibkarlığın təşviqi və dəstəklənməsi sahəsində layihələrin davam etdiriləcəyini vurğulayıb və iştirakçılara uğurlar arzulayıblar.
AQSİA ilə “Aqro Mall” arasında imzalanan əməkdaşlıq memorandumuna əsasən, bir il müddətində qadınların əl işlərinin satış sərgisi ticarət mərkəzində nümayiş olunacaq. Tədbir çərçivəsində sərgiyə baxış da keçirilib və xarici turistlərin iştirakı ilə sərginin əhəmiyyəti vurğulanıb.
