“Yaşıl Dünya Naminə Həmrəylik İli” çərçivəsində ekoloji və insan hüquqları mövzusunda konfrans keçirilib

AQSİA sədri Səkinə Babayeva ikinci paneldə iştirak edib

Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Yaşıl Dünya Naminə Həmrəylik İli” çərçivəsində “Ekoloji tarazlığın və insan hüquqlarının təminatı sahəsində vətəndaş cəmiyyətinin rolunun artırılması” mövzusunda konfrans keçirilib.

Açılış nitqi ilə çıxış edən Dövlət Komitəsinin sədri Bahar Muradova, tədbir iştirakçılarını salamlayıb və konfransın vacib mövzuya həsr olunduğunu bildirib. Ötən ilin tarixi hadisələrlə yadda qaldığını vurğulayan Komitə sədri, Azərbaycanın öz gücü, qətiyyəti və iradəsi ilə Qarabağ problemini həll etdiyini, ölkəmizin regionun güclü dövləti olaraq əsas məqsədinin təhlükəsizlik və sülh olduğunu bütün dünyaya elan etməkdir. O, ölkə Prezidenti cənab İlham Əliyevin qarşıya qoyduğu hədəflərdən bəhs edərək əlavə edib ki, bu hədəflər uğrunda bütün cəmiyyət səfərbər olmasını, Azərbaycanın tərəfdaşları ilə birlikdə həm regionda, həm də dünyada gedən proseslərə öz töhfəsini verməli və əldə etiyi qələbəni qoruyaraq, gələcəyə daşımalı olduğunu qeyd edib.

Bahar Muradovanın moderatoru olduğu Qərbi Azərbaycana qayıdış mövzusunda birinci paneldə Milli Məclisin deputatı, Qərbi Azərbaycan İcmasının İdarə Heyətinin sədri Əziz Ələkbərov, Milli Məclisin Beynəlxalq Münasibətlər və Parlamentlərarası Əlaqələr Komitəsinin sədr müavini Sevinc Fətəliyeva, Regional İnkişaf İctimai Birliyi, Beynəlxalq təşkilatlarla əməkdaşlıq şöbəsinin layihə koordinatoru Şəhla Talıbzadə, Əməkdar mədəniyyət işçisi, Azərbaycan Respublikası Milli Televiziya və Radio Şurasının üzvü Telli Pənahqızının çıxışları dinlənilib.

Panelçilər Qərbi Azərbaycanda, eləcə də Qarabağda illərdir törədilən mədəni və ekoloji terror barədə məlumat verib, bu gün işğaldan azad edilən ərazilərdə ekologiyanın bərpası istiqamətində həyata keçirilən layihələrdən danışıblar.

“İqlim Dəyişmələrinə qarşı Qlobal Mübarizədə Azərbaycanın Rolu” mövzusunda ikinci panel Zahid Orucun moderatorluğu ilə baş tutub. Müzakirələrdə Milli Məclisin Mədəniyyət Komitəsinin sədri Fazil Mustafa, deputat Nigar Arpadarai, Azərbaycan Qadın Sahibkarlığının İnkişafı Assosiasiyasının sədri Səkinə Babayeva, İDEA İctimai Birliyinin Layihələrlə iş üzrə şöbəsinin müdiri Zərxanım Ağayeva iştirak edib.