AQSİA və Təhsil Tələbə Krediti Fondu qadın sahibkarlarla görüş keçirib

Görüşdə təhsil kreditlərindən yararlanmış tələbələrin işlə təmin olunmasına dəstək mövzusu müzakirə olunub

15 mart tarixində Təhsil Tələbə Krediti Fondu və Azərbaycanda Qadın Sahibkarlığının İnkişafı Assosiasiyasının birgə təşkilatçılığı ilə qadın sahibkarlarla görüş keçirilib. 25 nəfərə yaxın sahibkarın iştirak etdiyi görüş çərçivəsində TTKF-nin fəaliyyəti haqqında məlumat verilib və təhsil tələbə kreditindən yararlanmış şəxslərin işlə təmin olunma imkanlarına dəstək göstərilməsi barədə razılıq əldə olunub.

Görüş zamanı qeyd olunub ki, Təhsil Tələbə Krediti Fondundan yararlanmış tələbələrin işlə təmin olunma imkanlarını yaxşılaşdırmaq istiqamətində Fond tərəfindən davamlı iş aparılır. Tələbə və məzunların peşəkar bacarıqlarını artırması üçün əmək bazarının tələblərinə uyğun təcrübə proqramlarına cəlb edilməsi, karyera yarmarkalarında iştirakının təmin edilməsi, onların müxtəlif sahələrdə öz bacarıqlarını sınamaq və inkişaf etdirməsi üçün şəraitin yaradılması məqsədilə dövlət və özəl sektorun aparıcı təmsilçiləri ilə əməkdaşlıq qurulur.

İşəgötürənlərlə qarşılıqlı səmərəli əlaqələrin qurulmasına təkan verəcək görüşdə sahibkarların təmsil etdiyi müəssisələrdə könüllü və təcrübə proqramları, o cümlədən seminar və təlimlər keçirilməsinin dəstəklənməsi, tələbə və məzunların ixtisaslarına uyğun təcrübə proqramlarına cəlb edilməsi, müvafiq sahə üzrə vakansiyalar yaranarsa təhsil tələbə kreditlərindən yararlanmış təhsilalanlara və məzunlara üstünlük verilməsi barədə razılıq əldə olunub. Azərbaycanda Qadın Sahibkarlığının İnkişafı Assosiasiyasının idarə heyətinin sədri Səkinə Babayeva assosiasiyanın təhsil sahəsində ən böyük missiyasının xaricə təhsil satmaq olduğunu vurğulayıb.