“Müstəqil Azərbaycan və Qadınlar” Mövzusunda Tədbir Keçirilib

İşgüzar qadınları bir araya gətirən tədbir Müstəqillik günü münasibətilə təşkil olunub

18 oktyabr Müstəqillik günü münasibətilə “Qadınların İnkişafına və Maarifləndirilməsinə Dəstək İctimai Birliyi”, “Azərbaycanda Qadın Sahibkarlığının İnkişafı Assosiasiyası” (AQSİA), “Agromix” MMC və BanuÇiçək brendinin birgə təşəbbüsü ilə “Müstəqil Azərbaycan və Qadınlar” mövzusunda tədbir keçirilib.

Tədbirdə dövlət qurumlarında və müxtəlif biznes sahələrində çalışan qadınlar, həmçinin qadın QHT rəhbər və üzvləri iştirak ediblər. Tədbirin əsas məqsədi müstəqil Azərbaycanın müxtəlif sahələrində fəaliyyət göstərən işgüzar qadınları bir araya toplamaq və onların arasında işgüzar əlaqələrin yaradılmasına şərait yaratmaq olub.

AQSİA-nın sədri Səkinə Babayeva çıxışında qeyd edib:
“Azərbaycanda işgüzar qadınların sayının artmasını dəstəkləyirik və onların fəaliyyətlərini daha da genişləndirmələrinə kömək oluruq. Ölkəmizin inkişafı üçün iqtisadi cəhətdən müstəqil və güclü qadınlar həmişə ön planda olmalıdır. Biz qadınların işgüzar mühitdə fəal olmalarına şərait yaradır, onların təhsil və peşəkar bacarıq səviyyəsini artırır, məhsul istehsal edən sahibkar qadınların ixrac qabiliyyətinin artırılmasına dəstək veririk. Bu gün təşkil olunan tədbir göstərir ki, müxtəlif sahələrdən olan qadınlar bir platforma ətrafında birləşərək uğurlu addımlar atırlar.”